is tarh dil se dard ka sauda karenge hum

is tarh dil se dard kā saudā kareñge ham

ḳhud zaḳhm khā ke ḳhud hī mudāvā kareñge ham

mar jā.eñge kabhī bhī na aisā kareñge ham

sochā bhī kaise aap ko rusvā kareñge ham

gintī ke sirf chaar hī din haiñ hamāre paas

is muḳhtasar hayāt meñ kyā kyā kareñge ham

ham ko chaḌhā ke daar karo khel ḳhatm-shud

zinda rahe to aur tamāsha kareñge ham

gar raushnī kī ham ko zarūrat paḌī kabhī

ḳhud apnā ghar jalā ke ujālā kareñge ham

jiine kā Dhang dekh ke hairāñ na hoñ janāb

hañsne kā Dhoñg aur bhī pyārā kareñge ham

luTne ke baa'd ham ne ye sochā hai har dafa'

itnā kisī pe ab na bharosa kareñge ham

qismat se jo milā hai hameñ vo qubūl hai

'ahmad' usī ke saath guzārā kareñge ham

is tarh dil se dard ka sauda karenge hum

KHud zaKHm kha ke KHud hi mudawa karenge hum

mar jaenge kabhi bhi na aisa karenge hum

socha bhi kaise aap ko ruswa karenge hum

ginti ke sirf chaar hi din hain hamare pas

is muKHtasar hayat mein kya kya karenge hum

hum ko chaDha ke dar karo khel KHatm-shud

zinda rahe to aur tamasha karenge hum

gar raushni ki hum ko zarurat paDi kabhi

KHud apna ghar jala ke ujala karenge hum

jine ka Dhang dekh ke hairan na hon janab

hansne ka Dhong aur bhi pyara karenge hum

luTne ke ba'd hum ne ye socha hai har dafa'

itna kisi pe ab na bharosa karenge hum

qismat se jo mila hai hamein wo qubul hai

'ahmad' usi ke sath guzara karenge hum