aazurda na ho kashmakash-e-dil ki taraf se

āzurda na ho kashmakash-e-dil kī taraf se

tūfāñ ko guzar jaane de sāhil kī taraf se

ḳhuddārī-e-kirdār kī ġhairat ko miTā kar

ham kaise guzarte tirī mahfil kī taraf se

bachiye bhī kahāñ tak ki hai imkān-e-tabāhī

tūfāñ kī taraf se kabhī sāhil kī taraf se

ye ḳhaar ye dushvārī-e-jāda ye dhuñdalke

sāmān-e-pazīrā.ī haiñ manzil kī taraf se

tauhīn-e-musāfir hai ġham-e-dūri-e-manzil

ab ek qadam aur sahī dil kī taraf se

aise meñ na martā ho agar koī to mar jaa.e

aatī hai havā kūcha-e-qātil kī taraf se

manzil ne qadam baḌh ke liye 'josh' sar-e-rāh

jab ham ne nazar pher lī manzil kī taraf se

aazurda na ho kashmakash-e-dil ki taraf se

tufan ko guzar jaane de sahil ki taraf se

KHuddari-e-kirdar ki ghairat ko miTa kar

hum kaise guzarte teri mahfil ki taraf se

bachiye bhi kahan tak ki hai imkan-e-tabahi

tufan ki taraf se kabhi sahil ki taraf se

ye KHar ye dushwari-e-jada ye dhundalke

saman-e-pazirai hain manzil ki taraf se

tauhin-e-musafir hai gham-e-duri-e-manzil

ab ek qadam aur sahi dil ki taraf se

aise mein na marta ho agar koi to mar jae

aati hai hawa kucha-e-qatil ki taraf se

manzil ne qadam baDh ke liye 'josh' sar-e-rah

jab hum ne nazar pher li manzil ki taraf se