aankh mein aansu nahin lab par gile shikwe nahin

aañkh meñ aañsū nahīñ lab par gile shikve nahīñ

'aam logoñ kī tarah ham chāhne vaale nahīñ

dekhne vaale the jab tak vo nazar aa.e nahīñ

ab nazar aane lage to dekhne vaale nahīñ

dekhte haiñ aap ke sab taur ham andhe nahīñ

ye alag hai baat apne muñh se kuchh kahte nahīñ

aane vaale un ke jalvoñ meñ haiñ gum sañbhle nahīñ

lauT kar bhī un kī mahfil se abhī lauTe nahīñ

'aib-poshī kar ke us ne laaj rakh lī hashr meñ

jo gunah chhup kar kiye the ham ne vo pūchhe nahīñ

jo bhī dekheñge kareñge us par iz.hār-e-ḳhayāl

ham zamāne kī tarah andhe nahīñ gūñge nahīñ

ai lahad rahtā hai tan kā hosh kab marne ke baa'd

lekin aa.e haiñ pahan kar ham kafan nange nahīñ

aur to kuchh bhī nahīñ hai bas samajh kā pher hai

vo nahīñ samjhe haiñ yā phir ham unheñ samjhe nahīñ

kyuuñ mire dushman ka.ī din se bahut ḳhāmosh haiñ

kyā sharāfat aa ga.ī hai yā na.e harbe nahīñ

tuur kī choTī hī par ġhash khā ke muusā gir paḌe

vo to kahiye ḳhair guzrī tuur se luḌhke nahīñ

dushman un ke bal pe itnā sher hai varna 'adīl'

us ke achchhe bhī hamāre aage Tik sakte nahīñ

aankh mein aansu nahin lab par gile shikwe nahin

'am logon ki tarah hum chahne wale nahin

dekhne wale the jab tak wo nazar aae nahin

ab nazar aane lage to dekhne wale nahin

dekhte hain aap ke sab taur hum andhe nahin

ye alag hai baat apne munh se kuchh kahte nahin

aane wale un ke jalwon mein hain gum sanbhle nahin

lauT kar bhi un ki mahfil se abhi lauTe nahin

'aib-poshi kar ke us ne laj rakh li hashr mein

jo gunah chhup kar kiye the hum ne wo puchhe nahin

jo bhi dekhenge karenge us par izhaar-e-KHayal

hum zamane ki tarah andhe nahin gunge nahin

ai lahad rahta hai tan ka hosh kab marne ke ba'd

lekin aae hain pahan kar hum kafan nange nahin

aur to kuchh bhi nahin hai bas samajh ka pher hai

wo nahin samjhe hain ya phir hum unhen samjhe nahin

kyun mere dushman kai din se bahut KHamosh hain

kya sharafat aa gai hai ya nae harbe nahin

tur ki choTi hi par ghash kha ke musa gir paDe

wo to kahiye KHair guzri tur se luDhke nahin

dushman un ke bal pe itna sher hai warna 'adil'

us ke achchhe bhi hamare aage Tik sakte nahin