aaj tere hukm se diwar bhi gir jaegi

aaj tere hukm se dīvār bhī gir jā.egī

haañ magar kal tak tirī sarkār bhī gir jā.egī

yaar mujh ko piiTh kī jānib se aa kar mārnā

varna tere haath se talvār bhī gir jā.egī

gir rahā hai din-ba-din me'yār terī soch kā

ab tirā lahja tirī guftār bhī gir jā.egī

qad baḌhāyā maiñ ne to darvāza chhoTā paḌ gayā

sar jhukā.ūñgā to ab dastār bhī gir jā.egī

surḳhiyoñ meñ chhup rahā hai aaj kal 'sāhil' kā naam

shahr meñ ab vaq'at-e-aḳhbār bhī gir jā.egī

aaj tere hukm se diwar bhi gir jaegi

han magar kal tak teri sarkar bhi gir jaegi

yar mujh ko piTh ki jaanib se aa kar marna

warna tere hath se talwar bhi gir jaegi

gir raha hai din-ba-din me'yar teri soch ka

ab tera lahja teri guftar bhi gir jaegi

qad baDhaya main ne to darwaza chhoTa paD gaya

sar jhukaunga to ab dastar bhi gir jaegi

surKHiyon mein chhup raha hai aaj kal 'sahil' ka nam

shahr mein ab waq'at-e-aKHbar bhi gir jaegi