har ek mauj-e-nafas hai yahan ziyan ke liye

har ek mauj-e-nafas hai yahāñ ziyāñ ke liye

taras rahī hai nazar ek sā.ibāñ ke liye

nazar uThā.ī to jalne lage ka.ī ḳhurshīd

hameñ pukārā thā kis chāñd ne yahāñ ke liye

ḳhamosh lab haiñ mire aañkh ḳhuun rotī hai

ye ek rang hī kaafī hai dāstāñ ke liye

ġhamoñ kī dhuup meñ ham ne jalā.e apne vujūd

ki kuchh charāġh to raushan hoñ kārvāñ ke liye

kitāb-e-zīst ke aurāq ulaT ke dekh zarā

hameñ likhā gayā ‘unvān-e-dāstāñ ke liye

pukārtī rahīñ sadiyāñ hameñ magar ham bhī

ruke rahe tire qadmoñ ke ik nishāñ ke liye

ḳhudā kare ki mirī ḳhaak kaam aa jaa.e

kisī uḌaan kisī shauq-e-be-karāñ ke liye

har ek mauj-e-nafas hai yahan ziyan ke liye

taras rahi hai nazar ek saiban ke liye

nazar uThai to jalne lage kai KHurshid

hamein pukara tha kis chand ne yahan ke liye

KHamosh lab hain mere aankh KHun roti hai

ye ek rang hi kafi hai dastan ke liye

ghamon ki dhup mein hum ne jalae apne wujud

ki kuchh charagh to raushan hon karwan ke liye

kitab-e-zist ke auraq ulaT ke dekh zara

hamein likha gaya ‘unwan-e-dastan ke liye

pukarti rahin sadiyan hamein magar hum bhi

ruke rahe tere qadmon ke ek nishan ke liye

KHuda kare ki meri KHak kaam aa jae

kisi uDan kisi shauq-e-be-karan ke liye