dagh-e-hasrat shumar karte hain
dāġh-e-hasrat shumār karte haiñ
ham sitāroñ se pyaar karte haiñ
muntazir kal bhī the kisī ke ham
aaj bhī intizār karte haiñ
kitne saada haiñ aaj tak ham log
aap kā e'tibār karte haiñ
ab ḳhizāñ meñ bhī tere dīvāne
pairahan taar taar karte haiñ
kārvāñ bhī unhīñ ko miltā hai
jo talāsh-e-ġhubār karte haiñ
ham qafas meñ bhī rah ke ai 'muztar'
ārzū-e-bahār karte haiñ
dagh-e-hasrat shumar karte hain
hum sitaron se pyar karte hain
muntazir kal bhi the kisi ke hum
aaj bhi intizar karte hain
kitne sada hain aaj tak hum log
aap ka e'tibar karte hain
ab KHizan mein bhi tere diwane
pairahan tar tar karte hain
karwan bhi unhin ko milta hai
jo talash-e-ghubar karte hain
hum qafas mein bhi rah ke ai 'muztar'
aarzu-e-bahaar karte hain
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
