hanste hanste wo tera hum ko rulana yaad hai

hañste hañste vo tirā ham ko rulānā yaad hai

ham ko terī dil-lagī kā vo zamāna yaad hai

aaj tak ham ne na paayā ek bhī ḳhat kā nishāñ

naam paḌhte hī mirā ḳhat ko jalānā yaad hai

raat din tere ḳhayāloñ meñ guzarte the kabhī

raat din terā hameñ vo yaad aanā yaad hai

vo na milne ke liye ham se bahāna bhī tirā

ġhair ke har ik bulāne par bhī jaanā yaad hai

mere aate hī vo un kī ḳhāmushī bhī 'arsalān'

aur mire jaate vo un kā lab hilānā yaad hai

hanste hanste wo tera hum ko rulana yaad hai

hum ko teri dil-lagi ka wo zamana yaad hai

aaj tak hum ne na paya ek bhi KHat ka nishan

nam paDhte hi mera KHat ko jalana yaad hai

raat din tere KHayalon mein guzarte the kabhi

raat din tera hamein wo yaad aana yaad hai

wo na milne ke liye hum se bahana bhi tera

ghair ke har ek bulane par bhi jaana yaad hai

mere aate hi wo un ki KHamushi bhi 'arsalan'

aur mere jate wo un ka lab hilana yaad hai