lafz sare thak chuke hain istiare bolte hain

lafz saare thak chuke haiñ isti'āre bolte haiñ

shoḳh sī is ḳhāmushī meñ dil hamāre bolte haiñ

farsh par jab koī 'āshiq dard se aa.heñ bhare hai

'arsh kī pahnā.iyoñ meñ tab sitāre bolte haiñ

kashtiyāñ jab Dagmagā.eñ hausle mat hārnā tum

bahr-e-ġham meñ Dūbte ko ḳhud kināre bolte haiñ

'ishq kī is raakh ko tum sard mat samjho ḳhudā-rā

ik bujhe tārīk dil meñ sau sharāre bolte haiñ

'aql vaale kyā samajh paa.eñ junūñ kī vus'atoñ ko

'ishq ke bāzār meñ to bas ḳhasāre bolte haiñ

TuuT jaate haiñ jahāñ par zindagī ke sab ta'alluq

us jagah par ġhaibī rahmat ke sahāre bolte haiñ

band āñkhoñ meñ hamesha husn kā jalva 'ayāñ hai

ḳhvāb kī in vādiyoñ meñ gum nazāre bolte haiñ

'ishq meñ 'almīr' ham ne hoñT apne sī liye haiñ

ashk āñkhoñ se gireñ to bin pukāre bolte haiñ

lafz sare thak chuke hain isti'are bolte hain

shoKH si is KHamushi mein dil hamare bolte hain

farsh par jab koi 'ashiq dard se aahen bhare hai

'arsh ki pahnaiyon mein tab sitare bolte hain

kashtiyan jab Dagmagaen hausle mat haarna tum

bahr-e-gham mein Dubte ko KHud kinare bolte hain

'ishq ki is rakh ko tum sard mat samjho KHuda-ra

ek bujhe tarik dil mein sau sharare bolte hain

'aql wale kya samajh paen junun ki wus'aton ko

'ishq ke bazar mein to bas KHasare bolte hain

TuT jate hain jahan par zindagi ke sab ta'alluq

us jagah par ghaibi rahmat ke sahaare bolte hain

band aankhon mein hamesha husn ka jalwa 'ayan hai

KHwab ki in wadiyon mein gum nazare bolte hain

'ishq mein 'almir' hum ne honT apne si liye hain

ashk aankhon se giren to bin pukare bolte hain