dariya tha magar aisi rawani mein nahin tha

dariyā thā magar aisī ravānī meñ nahīñ thā

ḳhud-sar maiñ kabhī itnā javānī meñ nahīñ thā

har vāqi'a mansūb thā merī tag-o-dau se

lekin mirā kirdār kahānī meñ nahīñ thā

yaktā.ī ne qīmat mirī muñh-māñgī baḌhā dī

mahñgā maiñ kabhī itnā girānī meñ nahīñ thā

maiñ shahr kī dīvār se lag kar nahīñ baiThā

ruknā to mirī naql-e-makānī meñ nahīñ thā

ḳhāmoshī ke har vasf se vāqif thā mirā zarf

mashshāq magar charb-zabānī meñ nahīñ thā

karnā thā use maiñ ne kisī zabt kā pāband

ye yaad mujhe yād-dahānī meñ nahīñ thā

har naql kabhī asl se behtar nahīñ hotī

yūsuf kā maza yūsuf-e-sānī meñ nahīñ thā

kyuuñ talḳh huā hai mirā ye lahja-e-shīrīñ

itnā to namak aañkh ke paanī meñ nahīñ thā

dariya tha magar aisi rawani mein nahin tha

KHud-sar main kabhi itna jawani mein nahin tha

har waqi'a mansub tha meri tag-o-dau se

lekin mera kirdar kahani mein nahin tha

yaktai ne qimat meri munh-mangi baDha di

mahnga main kabhi itna girani mein nahin tha

main shahr ki diwar se lag kar nahin baiTha

rukna to meri naql-e-makani mein nahin tha

KHamoshi ke har wasf se waqif tha mera zarf

mashshaq magar charb-zabani mein nahin tha

karna tha use main ne kisi zabt ka paband

ye yaad mujhe yaad-dahani mein nahin tha

har naql kabhi asl se behtar nahin hoti

yusuf ka maza yusuf-e-sani mein nahin tha

kyun talKH hua hai mera ye lahja-e-shirin

itna to namak aankh ke pani mein nahin tha