ghubar-e-rah ho kar chashm-e-mardum mein mahal paya

ġhubār-e-rāh ho kar chashm-e-mardum meñ mahal paayā

nihāl-e-ḳhāksārī ko lagā kar ham ne phal paayā

ba-rang-e-sham’ ham dil-soḳhtoñ ne bazm-e-'ālam meñ

zabāñ kholī na lekin baat karne kā mahal paayā

ra'ūnat kaun sī shai par hai in 'uzlat-guzīnoñ ko

hasīr-e-kohna dekhā dast-e-ḳhushk-o-pā-e-shal paayā

ġhazab hai manzil-e-hastī meñ āsā.ish-talab honā

hujūm-e-ḳhvāb se rahrav ne hai āḳhir ḳhalal paayā

hamesha josh-e-girya se rahā paanī meñ ai 'ātish'

kabhī taaza na lekin apne dil kā ye kañval paayā

ghubar-e-rah ho kar chashm-e-mardum mein mahal paya

nihaal-e-KHaksari ko laga kar hum ne phal paya

ba-rang-e-sham’ hum dil-soKHton ne bazm-e-'alam mein

zaban kholi na lekin baat karne ka mahal paya

ra'unat kaun si shai par hai in 'uzlat-guzinon ko

hasir-e-kohna dekha dast-e-KHushk-o-pa-e-shal paya

ghazab hai manzil-e-hasti mein aasaish-talab hona

hujum-e-KHwab se rahraw ne hai aaKHir KHalal paya

hamesha josh-e-girya se raha pani mein ai 'atish'

kabhi taza na lekin apne dil ka ye kanwal paya