keh do ye us se agle mahine holi hai

keh do ye us se agle mahīne holī hai

ham ne bhī rangoñ kī dukān ik kholī hai

barsoñ baa'd is hijr ke peḌ pe mor aa.e

barsoñ baa'd is peḌ pe koyal bolī hai

sūraj khelā saath mire is āñgan meñ

chāñd bhī koī ġhair nahīñ ham-jolī hai

ai 'attār-e-zamāna nusḳha to paḌh le

tū ne davā-e-vasl bahut kam tolī hai

pichkārī meñ bhar ke tamannāoñ kā lahū

holī khelne niklī kaun sī Tolī hai

is meñ hijr kī bāteñ vasl ke qisse bhī

ye merā dīvān tilismī jholī hai

keh do ye us se agle mahine holi hai

hum ne bhi rangon ki dukan ek kholi hai

barson ba'd is hijr ke peD pe mor aae

barson ba'd is peD pe koyal boli hai

suraj khela sath mere is aangan mein

chand bhi koi ghair nahin ham-joli hai

ai 'attar-e-zamana nusKHa to paDh le

tu ne dawa-e-wasl bahut kam toli hai

pichkari mein bhar ke tamannaon ka lahu

holi khelne nikli kaun si Toli hai

is mein hijr ki baaten wasl ke qisse bhi

ye mera diwan tilismi jholi hai