sahra ki garm dhup mein soya karunga main

sahrā kī garm dhuup meñ soyā karūñgā maiñ

ab bārishoñ ke saath na royā karūñgā maiñ

din ko uḌā karūñgā maiñ daane kī aaḌ meñ

panchhī kā rizq kāñdhe pe Dhoyā karūñgā maiñ

āñkhoñ meñ kārvāñ hai so rukne kā ab nahīñ

kāġhaz ko āñsuoñ se bhigoyā karūñgā maiñ

sahrā kī reg par bhī jalātā rahā huuñ jī

dil ko magar furāt se dhoyā karūñgā maiñ

chūmūñgā tere hoñT bhī nazroñ ke lams se

palkoñ pe un kī surḳhī piroyā karūñgā maiñ

dariyā meñ Daal dūñgā maiñ kāġhaz kī kashtiyāñ

bachpan ke biij piirī meñ boyā karūñgā maiñ

'kāshif' tumhārī ziist kī bikhrī kitāb meñ

dekhūñgā ek shakl to khoyā karūñgā maiñ

sahra ki garm dhup mein soya karunga main

ab barishon ke sath na roya karunga main

din ko uDa karunga main dane ki aaD mein

panchhi ka rizq kandhe pe Dhoya karunga main

aankhon mein karwan hai so rukne ka ab nahin

kaghaz ko aansuon se bhigoya karunga main

sahra ki reg par bhi jalata raha hun ji

dil ko magar furaat se dhoya karunga main

chumunga tere honT bhi nazron ke lams se

palkon pe un ki surKHi piroya karunga main

dariya mein Dal dunga main kaghaz ki kashtiyan

bachpan ke bij piri mein boya karunga main

'kashif' tumhaari zist ki bikhri kitab mein

dekhunga ek shakl to khoya karunga main