sahil pe khaDe ho ke tamasha nahin karte

sāhil pe khaḌe ho ke tamāshā nahīñ karte

ham Dūbtī kashtī kā nazārā nahīñ karte

tūfāñ se laḌā dete haiñ jo apnā safīnā

sāhil ko kabhī apnā kinārā nahīñ karte

tum dhuup ke sahrā meñ kise DhūñDh rahe ho

ye jhaaḌ haiñ kāñToñ ke jo saayā nahīñ karte

ab paas mire kuchh bhī nahīñ hai jo luTā duuñ

ham dostī ai dost dubārā nahīñ karte

ḳhushbū hai tirī yaad kī har vaqt mire saath

ham phuul kī ḳhushbū pe guzārā nahīñ karte

har gosha-e-dil meñ tirī tasvīr lagī hai

ham naqsh koī aur utārā nahīñ karte

āñkhoñ ke ishāre se bulā sakte haiñ jo bhī

vo naam kabhī le ke pukārā nahīñ karte

jo log 'taqī' husn kī 'azmat ke haiñ qaa.il

vo husn ko pardoñ meñ gavārā nahīñ karte

sahil pe khaDe ho ke tamasha nahin karte

hum Dubti kashti ka nazara nahin karte

tufan se laDa dete hain jo apna safina

sahil ko kabhi apna kinara nahin karte

tum dhup ke sahra mein kise DhunDh rahe ho

ye jhaD hain kanTon ke jo saya nahin karte

ab pas mere kuchh bhi nahin hai jo luTa dun

hum dosti ai dost dubara nahin karte

KHushbu hai teri yaad ki har waqt mere sath

hum phul ki KHushbu pe guzara nahin karte

har gosha-e-dil mein teri taswir lagi hai

hum naqsh koi aur utara nahin karte

aankhon ke ishaare se bula sakte hain jo bhi

wo nam kabhi le ke pukara nahin karte

jo log 'taqi' husn ki 'azmat ke hain qail

wo husn ko pardon mein gawara nahin karte