karwan ki Dolti kashti ka manzar dekh le

kārvāñ kī Doltī kashtī kā manzar dekh le

qāfile kī samt bhī ai kaash rahbar dekh le

sun zarā kūñjoñ ke nauhe chup kabūtar dekh le

haal bastī kī tabāhī kā bhī aa kar dekh le

har taraf phailī udāsī ai sitam-gar dekh le

ḳhushk dariyā dekh le sūkhā samundar dekh le

ahl-e-haq tā'dād kī buniyād par chalte nahīñ

dekh mat lākhoñ kī jānib bas bahattar dekh le

bebasī kī intihā par hastī-e-dil-doz hai

ho ga.ī hai zindagānī kitnī dūbhar dekh le

is liye bhī maiñ ne barsoñ aañkh jhapkā.ī nahīñ

'ain-mumkin hai mirī jānib palaT kar dekh le

maiñ biyāhī jā chukī lekin tumhāre hijr se

Daal kapḌoñ par nazar aur maile zevar dekh le

yuuñ to vo āfāq meñ bhī hai 'razā' jalva-fagan

vaise achchhā to yahī hai dil ke andar dekh le

karwan ki Dolti kashti ka manzar dekh le

qafile ki samt bhi ai kash rahbar dekh le

sun zara kunjon ke nauhe chup kabutar dekh le

haal basti ki tabahi ka bhi aa kar dekh le

har taraf phaili udasi ai sitam-gar dekh le

KHushk dariya dekh le sukha samundar dekh le

ahl-e-haq ta'dad ki buniyaad par chalte nahin

dekh mat lakhon ki jaanib bas bahattar dekh le

bebasi ki intiha par hasti-e-dil-doz hai

ho gai hai zindagani kitni dubhar dekh le

is liye bhi main ne barson aankh jhapkai nahin

'ain-mumkin hai meri jaanib palaT kar dekh le

main biyahi ja chuki lekin tumhaare hijr se

Dal kapDon par nazar aur maile zewar dekh le

yun to wo aafaq mein bhi hai 'raza' jalwa-fagan

waise achchha to yahi hai dil ke andar dekh le