کہیں تو عشق کی آوارگی کو رنگ ملے

کہیں تو عشق کی آوارگی کو رنگ ملے

دیار‌ گل نہیں ملتا دیار سنگ ملے

مرے لہو میں نہا کر بہار جب پلٹی

دھواں دھواں تھے جو چہرے وہ رنگ رنگ ملے

انہیں سے پوچھئے کیا ہے نزاکت پرواز

جنہیں زمیں کی طرح آسماں بھی تنگ ملے

کھڑے ہیں دوست بھی دشمن بھی اب یہ کیا کہئے

کدھر سے پھول ملے ہیں کدھر سے سنگ ملے

ورق ورق پہ نمایاں تھی اک نئی تحریر

حجاب‌ گل میں بھی کتنے حجاب رنگ ملے

نصیب سب کو کہاں عزت شناسائی

اٹھا کے سر کو جو گزرے انہی کو سنگ ملے

سنا ہے راہ میں کانٹوں نے سر اٹھایا ہے

ہماری آبلہ پائی کو اذن جنگ ملے

یہ سب غزل کی لطافت کا فیض ہے شاعرؔ

نئے نئے جو ہمیں سوچنے کے ڈھنگ ملے