kahin to ishq ki aawargi ko rang mile

kahīñ to 'ishq kī āvārgī ko rang mile

dayār-e-gul nahīñ miltā dayār-e-sang mile

mire lahū meñ nahā kar bahār jab palTī

dhuāñ dhuāñ the jo chehre vo rang rang mile

unhīñ se pūchhiye kyā hai nazākat-e-parvāz

jinheñ zamīñ kī tarah āsmāñ bhī tang mile

khaḌe haiñ dost bhī dushman bhī ab ye kyā kahiye

kidhar se phuul mile haiñ kidhar se sang mile

varaq varaq pe numāyāñ thī ik na.ī tahrīr

hijāb-e-gul meñ bhī kitne hijāb-e-rang mile

nasīb sab ko kahāñ 'izzat-e-shanāsā.ī

uThā ke sar ko jo guzre unhī ko sang mile

sunā hai raah meñ kāñToñ ne sar uThāyā hai

hamārī ābla-pā.ī ko izn-e-jang mile

ye sab ġhazal kī latāfat kā faiz hai 'shā'ir'

na.e na.e jo hameñ sochne ke Dhang mile

kahin to 'ishq ki aawargi ko rang mile

dayar-e-gul nahin milta dayar-e-sang mile

mere lahu mein naha kar bahaar jab palTi

dhuan dhuan the jo chehre wo rang rang mile

unhin se puchhiye kya hai nazakat-e-parwaz

jinhen zamin ki tarah aasman bhi tang mile

khaDe hain dost bhi dushman bhi ab ye kya kahiye

kidhar se phul mile hain kidhar se sang mile

waraq waraq pe numayan thi ek nai tahrir

hijab-e-gul mein bhi kitne hijab-e-rang mile

nasib sab ko kahan 'izzat-e-shanasai

uTha ke sar ko jo guzre unhi ko sang mile

suna hai rah mein kanTon ne sar uThaya hai

hamari aabla-pai ko izn-e-jang mile

ye sab ghazal ki latafat ka faiz hai 'sha'ir'

nae nae jo hamein sochne ke Dhang mile