jis din bhi zulm apni hadon se guzar gaya

jis din bhī zulm apnī hadoñ se guzar gayā

mazlūm kā nasīb usī din sañvar gayā

tū ḳhush thā mujh ko zulm kī bhaTTī meñ jhoñk kar

sonā thā maiñ to aur bhī tap kar nikhar gayā

ham haiñ hamārī aañkh abhī tak nahīñ khulī

ab to hamāre sar se bhī paanī guzar gayā

zālim ko mere sabr pe kuchh sochnā paḌā

ḳhāmosh rahnā merā baḌā kaam kar gayā

qātil ne āñkhoñ āñkhoñ meñ munsif se baat kī

ilzām mere qatl kā mere hī sar gayā

is ke shikasta-hāl pe rab kā karam thā ye

duniyā navāztī ga.ī 'māhir' jidhar gayā

jis din bhi zulm apni hadon se guzar gaya

mazlum ka nasib usi din sanwar gaya

tu KHush tha mujh ko zulm ki bhaTTi mein jhonk kar

sona tha main to aur bhi tap kar nikhar gaya

hum hain hamari aankh abhi tak nahin khuli

ab to hamare sar se bhi pani guzar gaya

zalim ko mere sabr pe kuchh sochna paDa

KHamosh rahna mera baDa kaam kar gaya

qatil ne aankhon aankhon mein munsif se baat ki

ilzam mere qatl ka mere hi sar gaya

is ke shikasta-haal pe rab ka karam tha ye

duniya nawazti gai 'mahir' jidhar gaya