alawa mere har ek shaKHs nur niklega

'alāva mere har ik shaḳhs nuur niklegā

maiñ jāntā huuñ mirā hī qusūr niklegā

ye ḳhuub ham se zamāne ne zid lagā.ī hai

huā na merā jo us kā zarūr niklegā

ḳhabar mujhe thī ye rasta nahīñ hai manzil kā

gumān kab thā ki ḳhud se bhī duur niklegā

hai rahzanoñ se ri'āyat ye ḳhaas munsif kī

ki qāfiloñ kā hī luT kar qusūr niklegā

isī umiid par ab aur kitnī 'umreñ jiyūñ

ki merā jiinā bhī ik din surūr niklegā

'ilāj DhūñDā to DhūñDā 'ajab tabīboñ ne

ye jaan nikle to dil kā futūr niklegā

hazār badlo magar ā.inoñ ke bas meñ nahīñ

ye 'aks merā yūñhī chuur chuur niklegā

nasha hai 'ārzī 'abrak' ye chāhe jaane kā

tumhāre dil se bhī jaldī ġhurūr niklegā

'alawa mere har ek shaKHs nur niklega

main jaanta hun mera hi qusur niklega

ye KHub hum se zamane ne zid lagai hai

hua na mera jo us ka zarur niklega

KHabar mujhe thi ye rasta nahin hai manzil ka

guman kab tha ki KHud se bhi dur niklega

hai rahzanon se ri'ayat ye KHas munsif ki

ki qafilon ka hi luT kar qusur niklega

isi umid par ab aur kitni 'umren jiyun

ki mera jina bhi ek din surur niklega

'ilaj DhunDa to DhunDa 'ajab tabibon ne

ye jaan nikle to dil ka futur niklega

hazar badlo magar aainon ke bas mein nahin

ye 'aks mera yunhi chur chur niklega

nasha hai 'arzi 'abrak' ye chahe jaane ka

tumhaare dil se bhi jaldi ghurur niklega