zamana ho gaya afsana-e-butan sunte

zamāna ho gayā afsāna-e-butāñ sunte

ab aarzū hai koī aur dāstāñ sunte

kisī bilāl ko laao hai sard sho'la-e-jāñ

diloñ meñ aag lagā detī vo azaañ sunte

bujhā chukā huuñ maiñ jab harf-o-saut kī sham'eñ

to chāhte haiñ tamanna-e-be-zabāñ sunte

manāte ab koī jashn-e-shikast hī yaaro

zabān-e-barq se rūdād-e-āshiyāñ sunte

badan ke giit bahut gaaye bhī sune bhī haiñ

kabhī kisī se hikāyāt-e-ramz-e-jāñ sunte

jalā.e baiThe haiñ ham kab se aarzū ke charāġh

phir un se qissa-e-gesū-o-kahkashāñ sunte

rachī huī hai mire bāzuoñ meñ jo ab tak

kabhī to phir se tum apnī vo dāstāñ sunte

maiñ vo fuġhāñ huuñ ta'āqub meñ jis ke phirtā huuñ

tumheñ bhī chain na paḌtā jo vo fuġhāñ sunte

bahut hasīñ thī 'na.īmī' bahut hī rangīñ thī

kisī se phir vo javānī kī dāstāñ sunte

zamana ho gaya afsana-e-butan sunte

ab aarzu hai koi aur dastan sunte

kisi bilal ko lao hai sard sho'la-e-jaan

dilon mein aag laga deti wo azan sunte

bujha chuka hun main jab harf-o-saut ki sham'en

to chahte hain tamanna-e-be-zaban sunte

manate ab koi jashn-e-shikast hi yaro

zaban-e-barq se rudad-e-ashiyan sunte

badan ke git bahut gaye bhi sune bhi hain

kabhi kisi se hikayat-e-ramz-e-jaan sunte

jalae baiThe hain hum kab se aarzu ke charagh

phir un se qissa-e-gesu-o-kahkashan sunte

rachi hui hai mere bazuon mein jo ab tak

kabhi to phir se tum apni wo dastan sunte

main wo fughan hun ta'aqub mein jis ke phirta hun

tumhein bhi chain na paDta jo wo fughan sunte

bahut hasin thi 'naimi' bahut hi rangin thi

kisi se phir wo jawani ki dastan sunte