unhen kam-hunar na guman kar wo dikhai den jo ramida bhi

unheñ kam-hunar na gumān kar vo dikhā.ī deñ jo ramīda bhī

yahī bhūle-bisre se log haiñ ġham-e-zindagī ke chunīda bhī

maiñ azal se jaarī zabūr huuñ maiñ 'arab kā ‘ajmī zuhūr huuñ

mujhe kam se kam vo paḌhe ki jo ho shu'ūr-o-she'r-chashīda bhī

tirī aarzū ne navāz dī mujhe merī zaat kī justujū

tirī aarzū ne kiyā mujhe isī justujū se rahīda bhī

usī ik nazar ke haiñ muntazir jo ho āshnā-e-rumūz-e-ġham

mirī chashm-e-ashk-chashīda bhī mirā qalb-e-ranj-gazīda bhī

yahī rah-guzar kī jo ḳhaak hai ye sarisht meñ koī chaak hai

yahīñ bante miTte haiñ roz-o-shab ka.ī naqsh-hā-e-kashīda bhī

koī qaul bhī koī fe'l bhī nahīñ is ḳhayāl se be-niyāz

hameñ likh rahā hai tavajjoh se koī fardā naamī jarīda bhī

na.e mustaqar se badal ga.ī na.e inhimāk meñ Dhal ga.ī

ḳhabar-e-tahayyur-e-‘ishq sun mirī 'aql-e-'umr-rasīda bhī

unhen kam-hunar na guman kar wo dikhai den jo ramida bhi

yahi bhule-bisre se log hain gham-e-zindagi ke chunida bhi

main azal se jari zabur hun main 'arab ka ‘ajmi zuhur hun

mujhe kam se kam wo paDhe ki jo ho shu'ur-o-she'r-chashida bhi

teri aarzu ne nawaz di mujhe meri zat ki justuju

teri aarzu ne kiya mujhe isi justuju se rahida bhi

usi ek nazar ke hain muntazir jo ho aashna-e-rumuz-e-gham

meri chashm-e-ashk-chashida bhi mera qalb-e-ranj-gazida bhi

yahi rah-guzar ki jo KHak hai ye sarisht mein koi chaak hai

yahin bante miTte hain roz-o-shab kai naqsh-ha-e-kashida bhi

koi qaul bhi koi fe'l bhi nahin is KHayal se be-niyaz

hamein likh raha hai tawajjoh se koi farda nami jarida bhi

nae mustaqar se badal gai nae inhimak mein Dhal gai

KHabar-e-tahayyur-e-‘ishq sun meri 'aql-e-'umr-rasida bhi