har ghaDi har waqt jis ko dhyan mein rakkha gaya

har ghaḌī har vaqt jis ko dhyān meñ rakkhā gayā

jo hamārī nazm ke 'unvān meñ rakkhā gayā

zillatoñ ne chun liye ḳheme yazīdoñ ke sabhī

'azm thā jo jang ke maidān meñ rakkhā gayā

ḳhud se milne kā vo naqsha ham ne DhūñDā hī nahīñ

jo hamāre vāste qur.ān meñ rakkhā gayā

rahmatoñ kī bārisheñ haiñ 'ilm ke dariyā bhī haiñ

kyā nahīñ jo sūra-e-rahmān meñ rakkhā gayā

tum se behtar tum se daanā koī duniyā meñ nahīñ

ye vo jumla thā jo sab ke kaan meñ rakkhā gayā

'andalīboñ ko rihā.ī is tarah baḳhshī ga.ī

hasrat-e-parvāz ko zindān meñ rakkhā gayā

ik musalsal hijr us par hashr ke din kā ḳhayāl

sabr ye kyūñ-kar dil-e-‘farhān’ meñ rakkhā gayā

har ghaDi har waqt jis ko dhyan mein rakkha gaya

jo hamari nazm ke 'unwan mein rakkha gaya

zillaton ne chun liye KHeme yazidon ke sabhi

'azm tha jo jang ke maidan mein rakkha gaya

KHud se milne ka wo naqsha hum ne DhunDa hi nahin

jo hamare waste quran mein rakkha gaya

rahmaton ki barishen hain 'ilm ke dariya bhi hain

kya nahin jo sura-e-rahman mein rakkha gaya

tum se behtar tum se dana koi duniya mein nahin

ye wo jumla tha jo sab ke kan mein rakkha gaya

'andalibon ko rihai is tarah baKHshi gai

hasrat-e-parwaz ko zindan mein rakkha gaya

ek musalsal hijr us par hashr ke din ka KHayal

sabr ye kyun-kar dil-e-‘farhan’ mein rakkha gaya