dekhna rasm-e-mohabbat ka ada ho jaana

dekhnā rasm-e-mohabbat kā adā ho jaanā

merī āġhosh kā suulī pe bhī vā ho jaanā

kabhī kaise nazar aanā kabhī kyā ho jaanā

bāvar aayā hameñ insāñ kā ḳhudā ho jaanā

is se pahle kabhī shāyad ki ye rut aa.ī ho

qad meñ sabze kā daraḳhtoñ se baḌā ho jaanā

zindagī tere maqāmāt kaḌe haiñ kitne

apne darvāze pe bhī aa ke gadā ho jaanā

us ne pāmāl kiyā hai to shikāyat kaisī

mujh ko mā'lūm hai miTTī kā harā ho jaanā

muddatoñ baa'd to aa.e ho koī baat karo

maan lo phir kisī fursat meñ ḳhafā ho jaanā

peḌ ke saa.e meñ baiThā huuñ magar jāntā huuñ

shāḳh se TuuT ke patte kā judā ho jaanā

log kahte haiñ ki rāhoñ meñ jal uThte haiñ diye

tum kisī shaam idhar se bhī zarā ho jaanā

dasht-e-ġhurbat hī pe mauqūf nahīñ ab 'hashmī'

apnī galiyoñ meñ phiro ābla-pā ho jaanā

dekhna rasm-e-mohabbat ka ada ho jaana

meri aaghosh ka suli pe bhi wa ho jaana

kabhi kaise nazar aana kabhi kya ho jaana

bawar aaya hamein insan ka KHuda ho jaana

is se pahle kabhi shayad ki ye rut aai ho

qad mein sabze ka daraKHton se baDa ho jaana

zindagi tere maqamat kaDe hain kitne

apne darwaze pe bhi aa ke gada ho jaana

us ne pamal kiya hai to shikayat kaisi

mujh ko ma'lum hai miTTi ka hara ho jaana

muddaton ba'd to aae ho koi baat karo

man lo phir kisi fursat mein KHafa ho jaana

peD ke sae mein baiTha hun magar jaanta hun

shaKH se TuT ke patte ka juda ho jaana

log kahte hain ki rahon mein jal uThte hain diye

tum kisi sham idhar se bhi zara ho jaana

dasht-e-ghurbat hi pe mauquf nahin ab 'hashmi'

apni galiyon mein phiro aabla-pa ho jaana