بارے الفت کے جز خطا کیا ہے

بارے الفت کے جز خطا کیا ہے

آخر اس جرم کی سزا کیا ہے

قتل کرتا ہے کس سلیقے سے

خنجر حسن میں ادا کیا ہے

ہم پہ وہ جن کا جبر گزرا ہے

پوچھتے ہیں ہمیں ہوا کیا ہے

بات بنتی ہو اس بنا پہ گر

گالیاں کھانے میں برا کیا ہے

ہم وہی تم وہی وہی شکوہ

سب تماشہ وہی نیا کیا ہے

چھوڑتے ہو نہ ساتھ رکھتے ہو

چاہتے کیا ہو مدعا کیا ہے

اشک ٹھہرے ہوئے ہیں آنکھوں میں

آج اس ابر کو ہوا کیا ہے

عشق نے کر دیا چراغ آخر

کیا کہیں اب کہ بد دعا کیا ہے

کس لیے ہے یہ ہاؤ ہو آخر

کیا سمجھ آ گیا خدا کیا ہے

ہر تمنا تمامؔ ہو جائے

گر سمجھ آئے فلسفہ کیا ہے