baada-e-kohna ke phir zer-e-asar hone tak

bāda-e-kohna ke phir zer-e-asar hone tak

tark-e-ulfat kareñ ham bār-e-digar hone tak

avval-e-‘ishq meñ hotā nahīñ ehsās-e-junūñ

but-e-ḳhush-rū ke magar rashk-e-qamar hone tak

ham ko darpesh hai phir ek safar lā-hāsil

gard ho jā.eñge ham garm-e-safar hone tak

dīda-e-shauq dikhātā hai tamāshe kyā kyā

nuur rahtā hai faqat nūr-e-nazar hone tak

ḳhūn-e-dil se hī likhī jaatī hai taqdīr kī lauh

ye ujālā hai faqat juzv-e-sharar hone tak

yā'nī jal bujhne pe mauqūf hai sham’-e-hastī

zindagī raqs meñ hai 'arz-e-hunar hone tak

sar-bulandī kī tamannā to sabhī karte haiñ

sar magar rahtā nahīñ sāhab-e-sar hone tak

ik munādī yahāñ har-gām sadā detā hai

kārvāñ saath hai ye tai hai safar hone tak

baada-e-kohna ke phir zer-e-asar hone tak

tark-e-ulfat karen hum bar-e-digar hone tak

awwal-e-‘ishq mein hota nahin ehsas-e-junun

but-e-KHush-ru ke magar rashk-e-qamar hone tak

hum ko darpesh hai phir ek safar la-hasil

gard ho jaenge hum garm-e-safar hone tak

dida-e-shauq dikhata hai tamashe kya kya

nur rahta hai faqat nur-e-nazar hone tak

KHun-e-dil se hi likhi jati hai taqdir ki lauh

ye ujala hai faqat juzw-e-sharar hone tak

ya'ni jal bujhne pe mauquf hai sham’-e-hasti

zindagi raqs mein hai 'arz-e-hunar hone tak

sar-bulandi ki tamanna to sabhi karte hain

sar magar rahta nahin sahab-e-sar hone tak

ek munadi yahan har-gam sada deta hai

karwan sath hai ye tai hai safar hone tak