jo bhi anjam ho aaghaz kiye dete hain

jo bhī anjām ho āġhāz kiye dete haiñ

mausamoñ ko nazar-andāz kiye dete haiñ

kuchh to pahle se thā rag rag meñ shujā.at kā surūr

kuchh hameñ aap bhī jāñ-bāz kiye dete haiñ

had se aage jo parinde nahīñ uḌne vaale

hādse un ko bhī shahbāz kiye dete haiñ

dasht o sahrā ye samundar ye jazīre ye pahāḌ

munkashif ham pe ka.ī raaz kiye dete haiñ

shab-e-zulmat na ho ġhamgīñ ki jalā kar ḳhud ko

nuur se tujh ko sar-afrāz kiye dete haiñ

shahr-e-jāñ par ka.ī barsoñ se musallat hai jumūd

chheḌ kar dil ko chalo saaz kiye dete haiñ

ham ki zinda haiñ abhī zulf-e-ġhazal aa tujh ko

phir atā nik.hat-e-shīrāz kiye dete haiñ

kaun aatā hai ayādat ke liye dekheñ 'farāġh'

apne jī ko zarā nā-sāz kiye dete haiñ

jo bhi anjam ho aaghaz kiye dete hain

mausamon ko nazar-andaz kiye dete hain

kuchh to pahle se tha rag rag mein shujaat ka surur

kuchh hamein aap bhi jaan-baz kiye dete hain

had se aage jo parinde nahin uDne wale

hadse un ko bhi shahbaz kiye dete hain

dasht o sahra ye samundar ye jazire ye pahaD

munkashif hum pe kai raaz kiye dete hain

shab-e-zulmat na ho ghamgin ki jala kar KHud ko

nur se tujh ko sar-afraaz kiye dete hain

shahr-e-jaan par kai barson se musallat hai jumud

chheD kar dil ko chalo saz kiye dete hain

hum ki zinda hain abhi zulf-e-ghazal aa tujh ko

phir ata nikhat-e-shiraaz kiye dete hain

kaun aata hai ayaadat ke liye dekhen 'faragh'

apne ji ko zara na-saz kiye dete hain