Thahra to ek sang-e-giran-bar jism tha

Thahrā to ek sang-e-girāñ-bār jism thā

varna havā se apnā subuksār jism thā

āñdhī uThī to ḳhaak kā tuuda laraz gayā

dariyā chaḌhā to ret kī dīvār jism thā

andar sulag rahā thā dhueñ meñ koī khañDar

bāhar se varna misr kā bāzār jism thā

sūraj kī tābnāk harārat ke bā-vajūd

saa.e kī tīrgī meñ giraftār jism thā

pesh aa.e har qadam pe mujhe saḳht marhale

bīmār ruuh thī kabhī bīmār jism thā

raushan tamām raat rahā chāñd kī tarah

tārīkiyoñ meñ matla'-e-anvār jism thā

Thahra to ek sang-e-giran-bar jism tha

warna hawa se apna subuksar jism tha

aandhi uThi to KHak ka tuda laraz gaya

dariya chaDha to ret ki diwar jism tha

andar sulag raha tha dhuen mein koi khanDar

bahar se warna misr ka bazar jism tha

suraj ki tabnak hararat ke ba-wajud

sae ki tirgi mein giraftar jism tha

pesh aae har qadam pe mujhe saKHt marhale

bimar ruh thi kabhi bimar jism tha

raushan tamam raat raha chand ki tarah

tarikiyon mein matla'-e-anwar jism tha