taraqqiyon ki dauD mein usi ka zor chal gaya

taraqqiyoñ kī dauḌ meñ usī kā zor chal gayā

banā ke apnā rāsta jo bhiiḌ se nikal gayā

sulag uTheñge jaane kitne dil hasad kī aag se

agar havā ke sāmne mirā charāġh jal gayā

kahāñ tū baat kar rahā thā khelne kī aag se

zarā sī aañch kyā lagī ki mom sā pighal gayā

zarā sī der ke liye jo aa gayā maiñ abr meñ

udhar ye shor mach gayā ki āftāb Dhal gayā

'urūj par nasīb thā to chhū rahā thā āsmāñ

bigaḌ gayā nasīb to zamīñ se bhī phisal gayā

mujhī ko apnī shakl aaj lag rahī hai ajnabī

na jaane kaun mere ghar ke aa.ine badal gayā

tirī mirī nigāh ke charāġh yuuñ na jal sake

kabhī havā.eñ chal paḌīñ kabhī samāñ badal gayā

'na'īm' hijratoñ kī rut ne zor bhī diyā magar

na baaġh se havā ga.ī na jhiil se kañval gayā

taraqqiyon ki dauD mein usi ka zor chal gaya

bana ke apna rasta jo bhiD se nikal gaya

sulag uThenge jaane kitne dil hasad ki aag se

agar hawa ke samne mera charagh jal gaya

kahan tu baat kar raha tha khelne ki aag se

zara si aanch kya lagi ki mom sa pighal gaya

zara si der ke liye jo aa gaya main abr mein

udhar ye shor mach gaya ki aaftab Dhal gaya

'uruj par nasib tha to chhu raha tha aasman

bigaD gaya nasib to zamin se bhi phisal gaya

mujhi ko apni shakl aaj lag rahi hai ajnabi

na jaane kaun mere ghar ke aaine badal gaya

teri meri nigah ke charagh yun na jal sake

kabhi hawaen chal paDin kabhi saman badal gaya

'na'im' hijraton ki rut ne zor bhi diya magar

na bagh se hawa gai na jhil se kanwal gaya