pahle bahisht-e-jaan se guzara gaya hun main

pahle bahisht-e-jāñ se guzārā gayā huuñ maiñ

phir ramz-e-mā'rifat meñ utārā gayā huuñ maiñ

ye 'ishq ab kī baar kahāñ le ke jā.egā

pahle bhī us ke haath se maarā gayā huuñ maiñ

apnī samā'atoñ se mujhe yuuñ gurez thā

jaane ke baa'd hī to pukārā gayā huuñ maiñ

un kī munāfiqat bhī mujhe hai 'azīz-tar

apnoñ pe is tarah se bhī vaarā gayā huuñ maiñ

lafzoñ kī shawl shawl ne mujh ko sajā diyā

sochoñ se apnī aap nikhārā gayā huuñ maiñ

vo 'ishq mar gayā thā 'bashar' phir ye kyā huā

kyuuñ rog kī lahad meñ utārā gayā huuñ maiñ

pahle bahisht-e-jaan se guzara gaya hun main

phir ramz-e-ma'rifat mein utara gaya hun main

ye 'ishq ab ki bar kahan le ke jaega

pahle bhi us ke hath se mara gaya hun main

apni sama'aton se mujhe yun gurez tha

jaane ke ba'd hi to pukara gaya hun main

un ki munafiqat bhi mujhe hai 'aziz-tar

apnon pe is tarah se bhi wara gaya hun main

lafzon ki shawl shawl ne mujh ko saja diya

sochon se apni aap nikhaara gaya hun main

wo 'ishq mar gaya tha 'bashar' phir ye kya hua

kyun rog ki lahad mein utara gaya hun main