jaise khilta hua phulon ka nagar dekh liya

jaise khiltā huā phūloñ kā nagar dekh liyā

baam par us ko sar-e-vaqt-e-sahar dekh liyā

kyā batā.ūñ shab-e-mahtāb kī rangat yaaro

chāñdnī meñ 'ajab ik rashk-e-qamar dekh liyā

go ki thī maut se baḌh kar shab-e-furqat phir bhī

dekh sakte to na the us ko magar dekh liyā

sāmne ashk bahānā pas-e-parda hañsnā

ham ne ahbāb kā aisā bhī hunar dekh liyā

mai-kade kī hameñ ab koī zarūrat na rahī

ham ne un mast nigāhoñ kā asar dekh liyā

ab talak apnī nigāhoñ meñ hai jalva un kā

ham ne 'rāvī' jo unheñ ek nazar dekh liyā

jaise khilta hua phulon ka nagar dekh liya

baam par us ko sar-e-waqt-e-sahar dekh liya

kya bataun shab-e-mahtab ki rangat yaro

chandni mein 'ajab ek rashk-e-qamar dekh liya

go ki thi maut se baDh kar shab-e-furqat phir bhi

dekh sakte to na the us ko magar dekh liya

samne ashk bahana pas-e-parda hansna

hum ne ahbab ka aisa bhi hunar dekh liya

mai-kade ki hamein ab koi zarurat na rahi

hum ne un mast nigahon ka asar dekh liya

ab talak apni nigahon mein hai jalwa un ka

hum ne 'rawi' jo unhen ek nazar dekh liya