apni binai ko KHud aankh se jata dekhe

apnī bīnā.ī ko ḳhud aañkh se jaatā dekhe

jo bhī us husn-e-mujassam ko sarāpā dekhe

paas manzil ke mirā raqs sabhī ne dekhā

koī to ho jo mire pair kā chhālā dekhe

shahr-e-ḳhāmosh ga.e us ko to muddat guzrī

aañkh be-chārī magar aaj bhī rastā dekhe

vaqt-e-ruḳhsat kuchh is andāz se dekhā us ne

Dūbte vaqt koī jaise kinārā dekhe

ye suhūlat bhī to majnūñ ko milī sahrā meñ

band āñkhoñ ko kare aur nazārā dekhe

jis ne haq-goī kī talqīn mujhe kal kī thī

aaj aa kar ke mire ghar kā vo malba dekhe

thā yaqīñ jis pe bikharne pe sameTegā mujhe

kam se kam vo to mirā yuuñ na tamāsha dekhe

sab charāġhoñ pe hī ilzām diye jaate haiñ

kis ko fursat hai havāoñ kā ishāra dekhe

kis meñ himmat hai jale tuur kī mānind yahāñ

kaun hai jo tire jalvoñ kā nazārā dekhe

apni binai ko KHud aankh se jata dekhe

jo bhi us husn-e-mujassam ko sarapa dekhe

pas manzil ke mera raqs sabhi ne dekha

koi to ho jo mere pair ka chhaala dekhe

shahr-e-KHamosh gae us ko to muddat guzri

aankh be-chaari magar aaj bhi rasta dekhe

waqt-e-ruKHsat kuchh is andaz se dekha us ne

Dubte waqt koi jaise kinara dekhe

ye suhulat bhi to majnun ko mili sahra mein

band aankhon ko kare aur nazara dekhe

jis ne haq-goi ki talqin mujhe kal ki thi

aaj aa kar ke mere ghar ka wo malba dekhe

tha yaqin jis pe bikharne pe sameTega mujhe

kam se kam wo to mera yun na tamasha dekhe

sab charaghon pe hi ilzam diye jate hain

kis ko fursat hai hawaon ka ishaara dekhe

kis mein himmat hai jale tur ki manind yahan

kaun hai jo tere jalwon ka nazara dekhe