wo jis ke qadmon mein phul rakkhe wo jis ki rah se haTae patthar

vo jis ke qadmoñ meñ phuul rakkhe vo jis kī rah se haTā.e patthar

yahī to dukh hai ki sab se pahle usī kī jānib se aa.e patthar

yahāñ pe ehsān karne vāloñ kī koī auqāt hī nahīñ hai

ki jin daraḳhtoñ pe phal lage the unhīñ daraḳhtoñ ne khaa.e patthar

jo ḳhud ko lohā batā rahā thā vo shaḳhs andar se aa.ina thā

tab us kī āñkhoñ meñ ḳhauf aayā ki maiñ ne jis dam uThā.e patthar

to dekhnā ab hamesha un meñ vafā kī ḳhush-bū basī rahegī

ye 'aam patthar nahīñ raheñge jo mere ḳhuuñ se nahā.e patthar

suno suno hai mujhe bhī zaḳhmoñ kī taab laane kā fan mayassar

so koī mujh pe taras na khaa.e ki jis kā dil ho chalā.e patthar

vafā jafā aur laḌā.ī jhagḌe ye donoñ jānib ke mas.ale haiñ

na saarī lailā.eñ mohtaram haiñ na saare majnūñ barā.e-patthar

kisī ke hāthoñ meñ hiire motī bhī apnā me'yār kho rahe haiñ

kisī ke pairoñ ke nīche aa.e chamak uThe jagmagā.e patthar

maiñ pahle pahle to ḳhush-mizājī-o-narm-lahje kā mo'tarif thā

phir is zamāne kī talḳhiyoñ ne banā diyā mujh ko haa.e patthar

tumhāre jaise udaas laḌke vahāñ pe baiThā kareñge 'kāshif'

ḳhudā ne yuuñ bhī banā.īñ jhīleñ ḳhudā ne yuuñ bhī banā.e patthar

wo jis ke qadmon mein phul rakkhe wo jis ki rah se haTae patthar

yahi to dukh hai ki sab se pahle usi ki jaanib se aae patthar

yahan pe ehsan karne walon ki koi auqat hi nahin hai

ki jin daraKHton pe phal lage the unhin daraKHton ne khae patthar

jo KHud ko loha bata raha tha wo shaKHs andar se aaina tha

tab us ki aankhon mein KHauf aaya ki main ne jis dam uThae patthar

to dekhna ab hamesha un mein wafa ki KHush-bu basi rahegi

ye 'am patthar nahin rahenge jo mere KHun se nahae patthar

suno suno hai mujhe bhi zaKHmon ki tab lane ka fan mayassar

so koi mujh pe taras na khae ki jis ka dil ho chalae patthar

wafa jafa aur laDai jhagDe ye donon jaanib ke masale hain

na sari lailaen mohtaram hain na sare majnun barae-patthar

kisi ke hathon mein hire moti bhi apna me'yar kho rahe hain

kisi ke pairon ke niche aae chamak uThe jagmagae patthar

main pahle pahle to KHush-mizaji-o-narm-lahje ka mo'tarif tha

phir is zamane ki talKHiyon ne bana diya mujh ko hae patthar

tumhaare jaise udas laDke wahan pe baiTha karenge 'kashif'

KHuda ne yun bhi banain jhilen KHuda ne yun bhi banae patthar