ghar tere paikan ke rahne ka naya paida karun

ghar tire paikāñ ke rahne kā nayā paidā karūñ

dil hai siine meñ to dil meñ aabla paidā karūñ

saaf kahiye zabt yā dil meñ mazā paidā karūñ

kyuuñ janāb-e-'ishq in donoñ meñ kyā paidā karūñ

jaan denā yuuñ to badnāmī hai un ke 'ishq meñ

koī mar jaane kā hiila ai qazā paidā karūñ

zulm vo ījād karte karte āḳhir thak ga.e

ḳhud hī kahte haiñ ki ab dil meñ vafā paidā karūñ

gar ijāzat dījiye to le ke bose baar baar

aap ke seb-e-zanaḳhdāñ meñ mazā paidā karūñ

chashm-e-jānāñ meñ napā.ūñ surme kā dumbāla maiñ

nargis-e-bīmār kī ḳhātir 'asā paidā karūñ

ik mohabbat aap kī hai ik 'adāvat ġhair kī

aap hī farmā.iye is dil meñ kyā paidā karūñ

hai ye dil meñ un ke jo koī na 'āshiq sah sake

mashvara kar ke falak se vo jafā paidā karūñ

chāhiye haiñ us shah-e-ḳhūbī ko bālish ke liye

kis tarah itne par-o-bāl-e-humā paidā karūñ

kuchh dinoñ se haa.e un ke dil meñ aa.ī hai ye baat

sab pukār uTTheñ qazā ko vo adā paidā karūñ

ye ishāra hai samand-e-ḳhush-ḳhirām-e-yār kā

bad-chalan huuñ maiñ jo raftār-e-sabā paidā karūñ

'ishq se maiñ ne jo pūchhā kab karūñ fariyād-e-zulm

bol uThā maiñ un ke dil meñ jab vafā paidā karūñ

ek abrū un kā paidā kar ke ḳhāliq ne kahā

ab munāsib hai ki tujh sā dūsrā paidā karūñ

har qadam par hai ye īmā-e-'asā mujh piir se

tum karo nāpaid maiñ jo naqsh-e-pā paidā karūñ

ye zamīn-e-kūcha-e-qātil se aatī hai sadā

jazb ho ḳhūn-e-shahīdāñ to hinā paidā karūñ

kahtī hai un kī javānī shoḳhiyāñ āñkhoñ meñ haiñ

Daal kar maiñ niiñd kā pardā hayā paidā karūñ

un ke dar par ai 'fasāhat' hai ye mujh saa.il ko fikr

dard ho jis meñ bharā aisī sadā paidā karūñ

ghar tere paikan ke rahne ka naya paida karun

dil hai sine mein to dil mein aabla paida karun

saf kahiye zabt ya dil mein maza paida karun

kyun janab-e-'ishq in donon mein kya paida karun

jaan dena yun to badnami hai un ke 'ishq mein

koi mar jaane ka hila ai qaza paida karun

zulm wo ijad karte karte aaKHir thak gae

KHud hi kahte hain ki ab dil mein wafa paida karun

gar ijazat dijiye to le ke bose bar bar

aap ke seb-e-zanaKHdan mein maza paida karun

chashm-e-jaanan mein napaun surme ka dumbaala main

nargis-e-bimar ki KHatir 'asa paida karun

ek mohabbat aap ki hai ek 'adawat ghair ki

aap hi farmaiye is dil mein kya paida karun

hai ye dil mein un ke jo koi na 'ashiq sah sake

mashwara kar ke falak se wo jafa paida karun

chahiye hain us shah-e-KHubi ko baalish ke liye

kis tarah itne par-o-baal-e-huma paida karun

kuchh dinon se hae un ke dil mein aai hai ye baat

sab pukar uTThen qaza ko wo ada paida karun

ye ishaara hai samand-e-KHush-KHiram-e-yar ka

bad-chalan hun main jo raftar-e-saba paida karun

'ishq se main ne jo puchha kab karun fariyaad-e-zulm

bol uTha main un ke dil mein jab wafa paida karun

ek abru un ka paida kar ke KHaliq ne kaha

ab munasib hai ki tujh sa dusra paida karun

har qadam par hai ye ima-e-'asa mujh pir se

tum karo napaid main jo naqsh-e-pa paida karun

ye zamin-e-kucha-e-qatil se aati hai sada

jazb ho KHun-e-shahidan to hina paida karun

kahti hai un ki jawani shoKHiyan aankhon mein hain

Dal kar main nind ka parda haya paida karun

un ke dar par ai 'fasahat' hai ye mujh sail ko fikr

dard ho jis mein bhara aisi sada paida karun