wo jhuT aisa kamal-e-hunar se bolta hai

vo jhuuT aisā kamāl-e-hunar se boltā hai

ki saarā shahr usī kī nazar se boltā hai

ye in dinoñ jo bahut bolne lagā hai dil

koī batā.e to kis ke asar se boltā hai

zamīn paaoñ ke nīche se boltī hai kabhī

to āsmāñ kabhī bālā-e-sar se boltā hai

darūn-e-ḳhāna ba-zāhir hai kaisā sabr-o-sukūt

'ajab sā ḳhauf magar bām-o-dar se boltā hai

dam-e-vidā' sunī hai kisī ne baat us kī

ba-chashm-e-ḳhushk musāfir jo ghar se boltā hai

na TuuT jaa.e kahīñ aa.ina samā'at kā

vo baat kartā hai to chashm-e-tar se boltā hai

dam-e-qayām kareñ baat saare 'uzv-e-badan

chale to har qadam apnī kamar se boltā hai

suḳhan hī asl ta'āruf hai aaj merā 'nadīm'

shajar ho koī bhī apne samar se boltā hai

wo jhuT aisa kamal-e-hunar se bolta hai

ki sara shahr usi ki nazar se bolta hai

ye in dinon jo bahut bolne laga hai dil

koi batae to kis ke asar se bolta hai

zamin paon ke niche se bolti hai kabhi

to aasman kabhi baala-e-sar se bolta hai

darun-e-KHana ba-zahir hai kaisa sabr-o-sukut

'ajab sa KHauf magar baam-o-dar se bolta hai

dam-e-wida' suni hai kisi ne baat us ki

ba-chashm-e-KHushk musafir jo ghar se bolta hai

na TuT jae kahin aaina sama'at ka

wo baat karta hai to chashm-e-tar se bolta hai

dam-e-qayam karen baat sare 'uzw-e-badan

chale to har qadam apni kamar se bolta hai

suKHan hi asl ta'aruf hai aaj mera 'nadim'

shajar ho koi bhi apne samar se bolta hai