tere chehre pe hai gar aankh purani koi

tere chehre pe hai gar aañkh purānī koī

mujh se mat maañg na.e fan kī nishānī koī

naqsh hai sab ke diloñ par mirī tahrīr magar

maiñ jo pūchhūñ to batā.e na ma'ānī koī

qissa-goī pe tujhe naaz bahut hai to sunā

jis meñ kirdār na ho aisī kahānī koī

vahī maiñ ne bhī kiyā jo mire jī meñ aayā

aur us ne bhī mirī baat na maanī koī

kaun kāfir hai ki īmān na laa.e tujh par

tū qayāmat hai to phir bhej nishānī koī

aisī tahrīr bhī likh jis meñ koī lafz na ho

aap pahnā.egā zanjīr-e-ma’ānī koī

kaun detā hai kināre ko kināre kī ḳhabar

mauj kartī nahīñ paiġhām-rasānī koī

zindagī bhiik kī sūrat meñ milī hai sab ko

pā ke itrā.e na poshāk purānī koī

aag paanī meñ lagā deñge lagāne vaale

aur sho'loñ se nichoḌegā na paanī koī

jo bhī sastā thā vahī bik gayā mahñgā ho kar

mujh se ḳhud par na chaḌhā rang-e-girānī koī

fā.eda naam kī shohrat se uThā le 'sājid'

bhej aḳhbār ko tasvīr purānī koī

tere chehre pe hai gar aankh purani koi

mujh se mat mang nae fan ki nishani koi

naqsh hai sab ke dilon par meri tahrir magar

main jo puchhun to batae na ma'ani koi

qissa-goi pe tujhe naz bahut hai to suna

jis mein kirdar na ho aisi kahani koi

wahi main ne bhi kiya jo mere ji mein aaya

aur us ne bhi meri baat na mani koi

kaun kafir hai ki iman na lae tujh par

tu qayamat hai to phir bhej nishani koi

aisi tahrir bhi likh jis mein koi lafz na ho

aap pahnaega zanjir-e-ma’ani koi

kaun deta hai kinare ko kinare ki KHabar

mauj karti nahin paigham-rasani koi

zindagi bhik ki surat mein mili hai sab ko

pa ke itrae na poshak purani koi

aag pani mein laga denge lagane wale

aur sho'lon se nichoDega na pani koi

jo bhi sasta tha wahi bik gaya mahnga ho kar

mujh se KHud par na chaDha rang-e-girani koi

faeda nam ki shohrat se uTha le 'sajid'

bhej aKHbar ko taswir purani koi