shaiKH ko humne kahin waqt-e-azan dekha hai

shaiḳh ko ham ne kahīñ vaqt-e-azāñ dekhā hai

ye magar ham na batā.eñge kahāñ dekhā hai

mish’al-e-rāh jahāñ 'azm-e-javāñ dekhā hai

har qadam par vahāñ manzil kā nishāñ dekhā hai

mahfil-e-husn meñ ik vo bhī samāñ dekhā hai

jis meñ har aañkh ko masrūf-e-bayāñ dekhā hai

ik 'ajab kaifiyat-e-dil hai ki jab se ham ne

tujh ko mā.il-ba-karam dushman-e-jāñ dekhā hai

aur bhī guzre haiñ duniyā meñ suḳhnavar 'rāhī'

sab se haT kar tirā andāz-e-bayāñ dekhā hai

shaiKH ko hum ne kahin waqt-e-azan dekha hai

ye magar hum na bataenge kahan dekha hai

mish’al-e-rah jahan 'azm-e-jawan dekha hai

har qadam par wahan manzil ka nishan dekha hai

mahfil-e-husn mein ek wo bhi saman dekha hai

jis mein har aankh ko masruf-e-bayan dekha hai

ek 'ajab kaifiyat-e-dil hai ki jab se hum ne

tujh ko mail-ba-karam dushman-e-jaan dekha hai

aur bhi guzre hain duniya mein suKHnawar 'rahi'

sab se haT kar tera andaz-e-bayan dekha hai