manega mashwara na agar dil dimagh ka

mānegā mashvara na agar dil dimāġh kā

ghar ko jalā ke chhoḌegā tel us charāġh kā

fankār-e-'asr-e-nau ko sadā de rahā hai aaj

sau dāstāñ liye hue har ġhuncha baaġh kā

hai zehn sang to use de maar sang par

be-kār jaane paa.e na laavā dimāġh kā

yakjā huā jo zehn to dekhā 'ajīb rang

muñh pher kar guzar gayā lamha farāġh kā

dil raushnī meñ kam nahīñ ḳhurshīd se magar

'rūhī' 'azāb-e-jāñ hai dhuāñ is charāġh kā

manega mashwara na agar dil dimagh ka

ghar ko jala ke chhoDega tel us charagh ka

fankar-e-'asr-e-nau ko sada de raha hai aaj

sau dastan liye hue har ghuncha bagh ka

hai zehn sang to use de mar sang par

be-kar jaane pae na lawa dimagh ka

yakja hua jo zehn to dekha 'ajib rang

munh pher kar guzar gaya lamha faragh ka

dil raushni mein kam nahin KHurshid se magar

'ruhi' 'azab-e-jaan hai dhuan is charagh ka