jo hum pe raaz-e-husn-o-ishq ka izhaar ho jae

jo ham pe rāz-e-husn-o-'ishq kā iz.hār ho jaa.e

to phir qalb-o-nazar kyā zindagī dushvār ho jaa.e

kareñ iqrār hī vo yā khulā inkār ho jaa.e

hayāt-o-maut kā ye faisla ek baar ho jaa.e

ye musht-e-ḳhāk jab mast-e-mai-e-pindār ho jaa.e

zamāne bhar kī nazroñ meñ zalīl-o-ḳhvār ho jaa.e

na pūchho zindagī us ḳhānamāñ-barbād 'āshiq kī

dayār-e-dost meñ jo ziist se bezār ho jaa.e

qayāmat hai ki jab vo mujh se merī aarzū pūchheñ

zabān-e-mudda’ā dāmāñda-e-guftār ho jaa.e

use ham jaan leñge ne’mat-e-dīdār se baḌh kar

agar un kī taraf se vā’da-e-dīdār ho jaa.e

nigāh-e-be-muhābā hī ġhazab hai dekhnā kyā ho

tirā ye tiir jab qalb-o-nazar ke paar ho jaa.e

kamāl-e-bandagī ne mujh ko is rutbe pe pahuñchāyā

jahāñ ab sar jhukā duuñ āstān-e-yār ho jaa.e

mirī mushkil-kushā.ī par koī mushkil-pasand aayā

ilāhī aur bhī mushkil mirī dushvār ho jaa.e

kabhī aisī bhī manzil se guzar hotā hai insāñ kā

rah-e-husn-o-mohabbat chashm-o-dil par baar ho jaa.e

ḳhushī DhūñDhī to ġham nikle vo ġham nikle ki dam nikle

jo dam nikle to phir dam bhar meñ beḌā paar ho jaa.e

ye kaisā husn jo ḳhud hī ko ḳhud par mubtalā kar le

ye kaisī nāzukī jo aap hī par baar ho jaa.e

hayāt-e-jāvedāñ paate haiñ bande maut ke 'tābāñ'

jise jiinā ho marne ke liye tayyār ho jaa.e

jo hum pe raaz-e-husn-o-'ishq ka izhaar ho jae

to phir qalb-o-nazar kya zindagi dushwar ho jae

karen iqrar hi wo ya khula inkar ho jae

hayat-o-maut ka ye faisla ek bar ho jae

ye musht-e-KHak jab mast-e-mai-e-pindar ho jae

zamane bhar ki nazron mein zalil-o-KHwar ho jae

na puchho zindagi us KHanaman-barbaad 'ashiq ki

dayar-e-dost mein jo zist se bezar ho jae

qayamat hai ki jab wo mujh se meri aarzu puchhen

zaban-e-mudda’a damanda-e-guftar ho jae

use hum jaan lenge ne’mat-e-didar se baDh kar

agar un ki taraf se wa’da-e-didar ho jae

nigah-e-be-muhaba hi ghazab hai dekhna kya ho

tera ye tir jab qalb-o-nazar ke par ho jae

kamal-e-bandagi ne mujh ko is rutbe pe pahunchaya

jahan ab sar jhuka dun aastan-e-yar ho jae

meri mushkil-kushai par koi mushkil-pasand aaya

ilahi aur bhi mushkil meri dushwar ho jae

kabhi aisi bhi manzil se guzar hota hai insan ka

rah-e-husn-o-mohabbat chashm-o-dil par bar ho jae

KHushi DhunDhi to gham nikle wo gham nikle ki dam nikle

jo dam nikle to phir dam bhar mein beDa par ho jae

ye kaisa husn jo KHud hi ko KHud par mubtala kar le

ye kaisi nazuki jo aap hi par bar ho jae

hayat-e-jawedan pate hain bande maut ke 'taban'

jise jina ho marne ke liye tayyar ho jae