dast-e-hawa se partaw-e-idrak ho gaye

dast-e-havā se partav-e-idrāk ho gaye

bādal bikhar ke dāman-e-sad-chāk ho gaye

tez is qadar thī apnī anā kī havā ki ham

āvāra sūrat-e-ḳhas-o-ḳhāshāk ho gaye

iz.hār pā ke bhī vo kab iz.hār pā sakā

be-rabt lafz dard kī poshāk ho gaye

kis shaan se uThe the bagūle jihat jihat

kyuuñ TūTte hī sehr-e-havā ḳhaak ho gaye

baiThe haiñ dil meñ ḳhanjar-e-hālāt ghoñp kar

mazlūm the magar baḌe saffāk ho gaye

afkār-e-nau ke tiir tarāzū haiñ zehn meñ

vahmoñ se pur-ḳhayāl ke fitrāk ho gaye

‘irfān-e-fan zarā huā hāsil hameñ to ham

iz.hār-e-zāt meñ baḌe be-bāk ho gaye

'ḳhālid' ḳhalā ḳhalā vahī saudā-e-āgahī

sahrā-navard rāhī-e-aflāk ho gaye

dast-e-hawa se partaw-e-idrak ho gaye

baadal bikhar ke daman-e-sad-chaak ho gaye

tez is qadar thi apni ana ki hawa ki hum

aawara surat-e-KHas-o-KHashak ho gaye

izhaar pa ke bhi wo kab izhaar pa saka

be-rabt lafz dard ki poshak ho gaye

kis shan se uThe the bagule jihat jihat

kyun TuTte hi sehr-e-hawa KHak ho gaye

baiThe hain dil mein KHanjar-e-haalat ghonp kar

mazlum the magar baDe saffak ho gaye

afkar-e-nau ke tir taraazu hain zehn mein

wahmon se pur-KHayal ke fitrak ho gaye

‘irfan-e-fan zara hua hasil hamein to hum

izhaar-e-zat mein baDe be-bak ho gaye

'KHalid' KHala KHala wahi sauda-e-agahi

sahra-naward rahi-e-aflak ho gaye