ashaar mein KHayal ko rakkha nahin gaya
ash'ār meñ ḳhayāl ko rakkhā nahīñ gayā
alfāz ko salīqe se bartā nahīñ gayā
dekhā hai jab se ḳhud ke garebāñ meñ jhāñk kar
maiñ ḳhud bhī apne aap se dekhā nahīñ gayā
har ek kī nazar meñ huuñ kitnā judā judā
samjhā gayā huuñ aise ki samjhā nahīñ gayā
bas ik jhalak dikhā.ī thī us nāznīn ne
aur phir nazar se merī vo chehra nahīñ gayā
aisā huā hai zaḳhmī hamārā zamīr ki
shīshe ke sāmne kabhī Thahrā nahīñ gayā
'rāvī' chalā gayā hai hameñ chhoḌ kar magar
us kā hamārī bazm se charchā nahīñ gayā
ash'ar mein KHayal ko rakkha nahin gaya
alfaz ko saliqe se barta nahin gaya
dekha hai jab se KHud ke gareban mein jhank kar
main KHud bhi apne aap se dekha nahin gaya
har ek ki nazar mein hun kitna juda juda
samjha gaya hun aise ki samjha nahin gaya
bas ek jhalak dikhai thi us naznin ne
aur phir nazar se meri wo chehra nahin gaya
aisa hua hai zaKHmi hamara zamir ki
shishe ke samne kabhi Thahra nahin gaya
'rawi' chala gaya hai hamein chhoD kar magar
us ka hamari bazm se charcha nahin gaya
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
