itni si baat ka itna baDa afsana bana

itnī sī baat kā itnā baḌā afsāna banā

koī dīvāna huā hai koī dīvāna banā

vo ziyārat-gah-e-majnūñ bahut ābād huī

apnī vahshat ke liye ab koī vīrāna banā

yā mire kandhoñ pe rakh phir vahī 'iisā kī salīb

yā to phir merī tabī'at ko ġhulāmāna banā

jal ke marne meñ mazā kyā hai jalo aur jiyo

zindagī jis ko na raas aa.ī vo parvāna banā

ujrat-e-hijr na maañg apnā garebān na bech

'ishq karnā ho to kar 'ishq ko pesha na banā

khiḌkiyāñ band na kar dil kī dukāneñ na jalā

bamba.ī jaise hasīñ shahr ko sahrā na banā

maktab-e-‘ishq kā ye pahlā sabaq hai 'rāhī'

haath kaTvā le magar haath ko pyāla na banā

itni si baat ka itna baDa afsana bana

koi diwana hua hai koi diwana bana

wo ziyarat-gah-e-majnun bahut aabaad hui

apni wahshat ke liye ab koi virana bana

ya mere kandhon pe rakh phir wahi 'isa ki salib

ya to phir meri tabi'at ko ghulamana bana

jal ke marne mein maza kya hai jalo aur jiyo

zindagi jis ko na ras aai wo parwana bana

ujrat-e-hijr na mang apna gareban na bech

'ishq karna ho to kar 'ishq ko pesha na bana

khiDkiyan band na kar dil ki dukanen na jala

bambai jaise hasin shahr ko sahra na bana

maktab-e-‘ishq ka ye pahla sabaq hai 'rahi'

hath kaTwa le magar hath ko pyala na bana