Tapke hain ashk-e-KHun jo barabar idhar udhar

Tapke haiñ ashk-e-ḳhūñ jo barābar idhar udhar

TukḌe haiñ ye jigar ke zamīñ par idhar udhar

laayā hai rang ḳhūn-e-shahīdān-e-ārzū

ghabrā ke dekhtā hai sitam-gar idhar udhar

pahlū badal badal ke guzārī shab-e-firāq

aise chubhe haiñ pahlū meñ nashtar idhar udhar

kaise alag kare koī zulmat ko nuur se

hai zulf shām-e-sub.h ke ruḳh par idhar udhar

un ke jabīn-o-'āriz-o-bāzū ke dū-ba-dū

bikhrī huī hai zulf-e-mo'ambar idhar udhar

hai bāġhbāñ ke gosha-e-dil meñ vo jalva-gar

gulchīñ ko kyā milegā ġhul-e-tar idhar udhar

rahrav ko kyā milegī kabhī manzil-e-hayāt

rāh-e-talab meñ bhaTkā hai rahbar idhar udhar

baiThā huuñ intizār meñ aayā na mere haath

ghūmā hai go ki bazm meñ sāġhar idhar udhar

dāman 'matīn' un kā daraḳhshāñ hai is tarah

jaise gire hoñ aañkh se gauhar idhar udhar

Tapke hain ashk-e-KHun jo barabar idhar udhar

TukDe hain ye jigar ke zamin par idhar udhar

laya hai rang KHun-e-shahidan-e-arzu

ghabra ke dekhta hai sitam-gar idhar udhar

pahlu badal badal ke guzari shab-e-firaq

aise chubhe hain pahlu mein nashtar idhar udhar

kaise alag kare koi zulmat ko nur se

hai zulf sham-e-subh ke ruKH par idhar udhar

un ke jabin-o-'ariz-o-bazu ke du-ba-du

bikhri hui hai zulf-e-mo'ambar idhar udhar

hai baghban ke gosha-e-dil mein wo jalwa-gar

gulchin ko kya milega ghul-e-tar idhar udhar

rahraw ko kya milegi kabhi manzil-e-hayat

rah-e-talab mein bhaTka hai rahbar idhar udhar

baiTha hun intizar mein aaya na mere hath

ghuma hai go ki bazm mein saghar idhar udhar

daman 'matin' un ka daraKHshan hai is tarah

jaise gire hon aankh se gauhar idhar udhar