taKHir se hi dard mein aaram to aaya

tāḳhīr se hī dard meñ ārām to aayā

saaqī na sahī bāda-e-gulfām to aayā

sad-shukr mire shauq kā in'ām to aayā

vo gesū-e-ḳhamdār lab-e-bām to aayā

rindoñ kī tasallī ke liye ye bhī bahut hai

maiḳhāne meñ koī tirā hamnām to aayā

nārāz nahīñ us se huā karte kabhī bhī

jo sub.h ko bhūlā thā sar-e-shām to aayā

tāḳhīr se aayā hai magar phir bhī ḳhushī hai

us gul kī hathelī pe mirā naam to aayā

phir dekh ke maiḳhāne meñ ham ko vo kahe hai

sayyād koī aaj tah-e-dām to aayā

ġhazloñ se mirī jaan milī tujh ko tasallī

'mushtāq' tire aaj kisī kaam to aayā

taKHir se hi dard mein aaram to aaya

saqi na sahi baada-e-gulfam to aaya

sad-shukr mere shauq ka in'am to aaya

wo gesu-e-KHamdar lab-e-baam to aaya

rindon ki tasalli ke liye ye bhi bahut hai

maiKHane mein koi tera hamnam to aaya

naraaz nahin us se hua karte kabhi bhi

jo subh ko bhula tha sar-e-sham to aaya

taKHir se aaya hai magar phir bhi KHushi hai

us gul ki hatheli pe mera nam to aaya

phir dekh ke maiKHane mein hum ko wo kahe hai

sayyaad koi aaj tah-e-dam to aaya

ghazlon se meri jaan mili tujh ko tasalli

'mushtaq' tere aaj kisi kaam to aaya