mohabbat ka safar hai kis qadar pechida-pechida

mohabbat kā safar hai kis qadar pechīda-pechīda

baḌhā merā qadam us raah par laġhzīda-laġhzīda

na ho māyūs tum rāh-e-talab meñ hausla rakkho

na ho gar zabt to ro lo magar poshīda-poshīda

mirī bazm-e-taḳhayyul meñ na.ī saj-dhaj se vo aa.e

shafaq gāloñ pe raqsāñ hai nazar duzdīda-duzdīda

lab-e-lā'līñ nazar aate haiñ yuuñ us rū-e-rañgīñ par

ġhul-e-tar ho koī juuñ shāḳh par ḳhandīda-ḳhandīda

sañvārā laakh maiñ ne fikr se zulf-e-pareshāñ ko

magar phir bhī milī vaqt-e-sahar zholīda-zholīda

batā.ūñ kis tarah us bā-hayā ke vasf maiñ tum ko

adā us kī hai dil-kash baat har sanjīda-sanjīda

na niklī hasrat-e-dil tishnagī bhī ho ga.ī duunī

vo aa.e dil kī duniyā meñ magar ḳhvābīda-ḳhvābīda

liye dil meñ tamannā us nigāh-e-mast kī aksar

phirā kartā huuñ rāhoñ meñ magar ranjīda-ranjīda

tasavvur bhī kisī kā ab mujhe dene lagā dhokā

huā jaatā huuñ maiñ kis par fidā nādīda-nādīda

na guzro tum 'matīn' ab be-ḳhudī meñ kū-e-jānāñ se

kahīñ vo ho na jaa.e dekh kar ġham-dīda-ġham-dīda

mohabbat ka safar hai kis qadar pechida-pechida

baDha mera qadam us rah par laghzida-laghzida

na ho mayus tum rah-e-talab mein hausla rakkho

na ho gar zabt to ro lo magar poshida-poshida

meri bazm-e-taKHayyul mein nai saj-dhaj se wo aae

shafaq galon pe raqsan hai nazar duzdida-duzdida

lab-e-la'lin nazar aate hain yun us ru-e-rangin par

ghul-e-tar ho koi jun shaKH par KHandida-KHandida

sanwara lakh main ne fikr se zulf-e-pareshan ko

magar phir bhi mili waqt-e-sahar zholida-zholida

bataun kis tarah us ba-haya ke wasf main tum ko

ada us ki hai dil-kash baat har sanjida-sanjida

na nikli hasrat-e-dil tishnagi bhi ho gai duni

wo aae dil ki duniya mein magar KHwabida-KHwabida

liye dil mein tamanna us nigah-e-mast ki aksar

phira karta hun rahon mein magar ranjida-ranjida

tasawwur bhi kisi ka ab mujhe dene laga dhoka

hua jata hun main kis par fida nadida-nadida

na guzro tum 'matin' ab be-KHudi mein ku-e-jaanan se

kahin wo ho na jae dekh kar gham-dida-gham-dida