ikaTTha KHud ko kare ya kahin bikhar jae

ikaTThā ḳhud ko kare yā kahīñ bikhar jaa.e

batāo dil se nikālā huā kidhar jaa.e

ilāj-e-dil-zadagāñ meñ na kījiye tāḳhīr

ye dard aisā na ho had se hī guzar jaa.e

tū apnā haq to jatātā hai zindagī pe mirī

ye titlī qaid meñ aa kar na terī mar jaa.e

maiñ misl-e-sāya tire saath saath chaltī rahūñ

tū rah-guzār-e-talab meñ jidhar jidhar jaa.e

batā.iye maiñ use be-vafā kahūñ na kahūñ

jo ahd-e-'ishq kare aur phir mukar jaa.e

agar maiñ us kī mohabbat ke aa.ine meñ rahūñ

mujhe yaqīñ hai mirī zindagī sañvar jaa.e

chalī bhī jaa.e agar daulat-e-digar koī

na mere haath se ye harf-e-mo'tabar jaa.e

agar vo saath nibhāne se Dar rahā hai mirā

use kaho ki bahut ho chukā mukar jaa.e

laraz sī jaatī huuñ ye sochtī huuñ jab bhī 'umūd'

mire hasīñ kā kahīñ mujh se dil na bhar jaa.e

ikaTTha KHud ko kare ya kahin bikhar jae

batao dil se nikala hua kidhar jae

ilaj-e-dil-zadagan mein na kijiye taKHir

ye dard aisa na ho had se hi guzar jae

tu apna haq to jatata hai zindagi pe meri

ye titli qaid mein aa kar na teri mar jae

main misl-e-saya tere sath sath chalti rahun

tu rah-guzar-e-talab mein jidhar jidhar jae

bataiye main use be-wafa kahun na kahun

jo ahd-e-'ishq kare aur phir mukar jae

agar main us ki mohabbat ke aaine mein rahun

mujhe yaqin hai meri zindagi sanwar jae

chali bhi jae agar daulat-e-digar koi

na mere hath se ye harf-e-mo'tabar jae

agar wo sath nibhane se Dar raha hai mera

use kaho ki bahut ho chuka mukar jae

laraz si jati hun ye sochti hun jab bhi 'umud'

mere hasin ka kahin mujh se dil na bhar jae