hijr ki shab mein teri yaad ka tara chamka

hijr kī shab meñ tirī yaad kā taarā chamkā

rūh-e-vīrāñ meñ koī dard purānā chamkā

matla'-e-'ishq pe ehsās kī kirnoñ ko liye

ik hasīñ chāñd sar-e-bām-e-tamannā chamkā

kaun aayā hai mire dil meñ sadā kī sūrat

kis kī aahaT kā mire kaan meñ naġhma chamkā

soch kar ye ki akelā hai ḳhunak raat kā chāñd

saath dene ko ye dil dard kā maarā chamkā

aaj āñkhoñ meñ kuchh aise tirā paikar utrā

jaise tārīk jazīroñ pe saverā chamkā

vo hai go duur mirī aañkh se 'ḳhālid' lekin

yaad ke sahn meñ us shoḳh kā vā'da chamkā

hijr ki shab mein teri yaad ka tara chamka

ruh-e-viran mein koi dard purana chamka

matla'-e-'ishq pe ehsas ki kirnon ko liye

ek hasin chand sar-e-baam-e-tamanna chamka

kaun aaya hai mere dil mein sada ki surat

kis ki aahaT ka mere kan mein naghma chamka

soch kar ye ki akela hai KHunak raat ka chand

sath dene ko ye dil dard ka mara chamka

aaj aankhon mein kuchh aise tera paikar utra

jaise tarik jaziron pe sawera chamka

wo hai go dur meri aankh se 'KHalid' lekin

yaad ke sahn mein us shoKH ka wa'da chamka