azan-e-subh se shab ka ilaj kya hoga

azān-e-sub.h se shab kā 'ilāj kyā hogā

mujhe to terā hī chehra sahar-numā hogā

is intizār meñ takmīl-e-kufr ho na sakī

kabhī to merā ḳhudā bhī mirā ḳhudā hogā

bahār kitnī hī be-rang ho bahār to hai

jo gul nahīñ to koī zaḳhm hī khilā hogā

vo tīrgī hai ki rāh-e-vafā se pūchhtā huuñ

tujhe to apne musāfir kā kuchh patā hogā

maiñ aaj tere tasavvur meñ muskurā to diyā

magar ye fikr hai kis kis kā dil jalā hogā

hai mere lams meñ ab tak tire badan kī mahak

tirī judā.ī kā haq mujh se kyā adā hogā

tire firāq meñ bhī tujh se rabt qaa.em hai

ki merī yaad meñ tū bhī to jāgtā hogā

mire dayār kī mānind tere shahr meñ bhī

udaas raat kā sannāTā ro rahā hogā

fazā meñ tair rahe hoñge kitne faq chehre

'ufuq kī dhaar pe mahtāb kaT gayā hogā

maiñ khul ke ro na sakā jab to ye ġhazal keh lī

bichhaḌ ke mujh se magar tū ne kyā kiyā hogā

azan-e-subh se shab ka 'ilaj kya hoga

mujhe to tera hi chehra sahar-numa hoga

is intizar mein takmil-e-kufr ho na saki

kabhi to mera KHuda bhi mera KHuda hoga

bahaar kitni hi be-rang ho bahaar to hai

jo gul nahin to koi zaKHm hi khila hoga

wo tirgi hai ki rah-e-wafa se puchhta hun

tujhe to apne musafir ka kuchh pata hoga

main aaj tere tasawwur mein muskura to diya

magar ye fikr hai kis kis ka dil jala hoga

hai mere lams mein ab tak tere badan ki mahak

teri judai ka haq mujh se kya ada hoga

tere firaq mein bhi tujh se rabt qaem hai

ki meri yaad mein tu bhi to jagta hoga

mere dayar ki manind tere shahr mein bhi

udas raat ka sannaTa ro raha hoga

faza mein tair rahe honge kitne faq chehre

'ufuq ki dhaar pe mahtab kaT gaya hoga

main khul ke ro na saka jab to ye ghazal keh li

bichhaD ke mujh se magar tu ne kya kiya hoga