apni KHabar nahin hai tere intizar mein

apnī ḳhabar nahīñ hai tire intizār meñ

bas meñ bahār hai na ḳhizāñ iḳhtiyār meñ

jo bad-gumāñ the vo abhī bhī bad-gumān haiñ

jin ko thā e'tibār vo haiñ e'tibār meñ

gulshan meñ apnā kaun thā sāthī na āshiyāñ

rakh lī qafas ne aabrū fasl-e-bahār meñ

rāh-e-talab meñ ham se koī bhuul ho ga.ī

aġhyār aa rahe haiñ nazar kū-e-yār meñ

māyūsiyoñ ne saath diyā lā-makān tak

ummīd so ga.ī thī tirī rah-guzār meñ

be-bākī aur chiiz hai gustāḳhī aur shai

lāzim hai ehtiyāt so hai mai-gusār meñ

'vāsif' jahān-e-'ishq meñ saudā-garī hai jurm

kab jiit ko ḳhabar hai jo hai lutf haar meñ

apni KHabar nahin hai tere intizar mein

bas mein bahaar hai na KHizan iKHtiyar mein

jo bad-guman the wo abhi bhi bad-guman hain

jin ko tha e'tibar wo hain e'tibar mein

gulshan mein apna kaun tha sathi na aashiyan

rakh li qafas ne aabru fasl-e-bahaar mein

rah-e-talab mein hum se koi bhul ho gai

aghyar aa rahe hain nazar ku-e-yar mein

mayusiyon ne sath diya la-makan tak

ummid so gai thi teri rah-guzar mein

be-baki aur chiz hai gustaKHi aur shai

lazim hai ehtiyat so hai mai-gusar mein

'wasif' jahan-e-'ishq mein sauda-gari hai jurm

kab jit ko KHabar hai jo hai lutf haar mein