ab aa bhi ja ki ye dil kitna intizar kare

ab aa bhī jā ki ye dil kitnā intizār kare

maiñ kyā karūñ jo tirā dard be-qarār kare

ye guftugū ye sharārat ye terā sharmānā

hasīn ḳhvāboñ meñ aa aa ke ham pe vaar kare

laboñ pe husn-e-tabassum baġhal meñ ḳhanjar hai

jo kaam koī nahīñ kar sakā vo yaar kare

ye kaun hai jo tire husn kā pujārī hai

ye kaun merī mohabbat ko dāġh-dār kare

yahāñ to saath bhī matlab se log dete haiñ

kise hai itnī 'aqīdat jo mujh se pyaar kare

maiñ tere shahr meñ phirtā huuñ pāgaloñ kī tarah

tirī judā.ī rag-e-jism tār-tār kare

ye kaisā vaar hai us kī hasīn āñkhoñ kā

ki tiir rahne de dil meñ na dil ke paar kare

tamām vaqt ko mahdūd kar ke fursat meñ

koī to ho jo mujhe yaad baar baar kare

aziyyatoñ se 'ibārat hai zindagī us kī

vo kaise dard mirā dard meñ shumār kare

na-jāne kitne bashar aur nā-ḳhudā Duube

samundaroñ pe koī kaise e'tibār kare

hameñ bhī kaash mayassar ho jism kī ḳhush-bū

hameñ bhī qaid koī zulf-e-mushk-bār kare

tumhārī ḳhūb-rū āñkhoñ meñ yuuñ basā 'amjad'

kahīñ pe aur koī ghar na iḳhtiyār kare

ab aa bhi ja ki ye dil kitna intizar kare

main kya karun jo tera dard be-qarar kare

ye guftugu ye shararat ye tera sharmana

hasin KHwabon mein aa aa ke hum pe war kare

labon pe husn-e-tabassum baghal mein KHanjar hai

jo kaam koi nahin kar saka wo yar kare

ye kaun hai jo tere husn ka pujari hai

ye kaun meri mohabbat ko dagh-dar kare

yahan to sath bhi matlab se log dete hain

kise hai itni 'aqidat jo mujh se pyar kare

main tere shahr mein phirta hun pagalon ki tarah

teri judai rag-e-jism tar-tar kare

ye kaisa war hai us ki hasin aankhon ka

ki tir rahne de dil mein na dil ke par kare

tamam waqt ko mahdud kar ke fursat mein

koi to ho jo mujhe yaad bar bar kare

aziyyaton se 'ibarat hai zindagi us ki

wo kaise dard mera dard mein shumar kare

na-jaane kitne bashar aur na-KHuda Dube

samundaron pe koi kaise e'tibar kare

hamein bhi kash mayassar ho jism ki KHush-bu

hamein bhi qaid koi zulf-e-mushk-bar kare

tumhaari KHub-ru aankhon mein yun basa 'amjad'

kahin pe aur koi ghar na iKHtiyar kare