teri taKHliq ne badle hain ye unwan kaise

tirī taḳhlīq ne badle haiñ ye 'unvāñ kaise

tan-e-insāñ meñ uchhalne lage haivāñ kaise

tū ne to ā'lā-o-ashraf kā sharaf baḳhshā thā

gir ke pātāl tak aa.e tire insāñ kaise

jab ki ehsās kā jhagḌā hī miTā Daalā ho

apne ā'māl pe phir koī pashemāñ kaise

kaun maḳhlūq-e-ġhalat-kār ko degā kashtī

nuuh jab koī nahīñ hai to ye tūfāñ kaise

tan ga.ī aa ke samundar kī ye chādar kyūñ-kar

haT gayā sar se mire sāya-e-yazdāñ kaise

aaj sūraj nahīñ paanī hai savā-neze par

saj gayā sar pe mire hashr kā maidāñ kaise

kis ne ābād gharoñdoñ ko khañDar kar Daalā

bas gaye shahr kī galiyoñ meñ bayābāñ kaise

apne hāthoñ se jahāñ tū ne kiyā hai ābād

apne hāthoñ se karegā use vīrāñ kaise

merā insān bhaTaktā to koī baat na thī

rāsta bhuul gayā hai tirā insāñ kaise

kitne vahshī nikal aa.e haiñ sar-e-'ām 'adīm'

khul gayā fitrat-e-ādam kā ye zindāñ kaise

ye nubuvvat kā zamāna to nahīñ koī 'adīm'

dil meñ ubhrī havas-e-taḳht-e-sulaimāñ kaise

zindagī maut se bad-tar huī jaatī hai 'adīm'

phir bhī hairat hai ki jiine ke haiñ armāñ kaise

ruuh par kitnī ḳharāsheñ haiñ tirī sāñsoñ kī

zindagī aur uThā.ūñ tire ehsāñ kaise

teri taKHliq ne badle hain ye 'unwan kaise

tan-e-insan mein uchhalne lage haiwan kaise

tu ne to aa'la-o-ashraf ka sharaf baKHsha tha

gir ke patal tak aae tere insan kaise

jab ki ehsas ka jhagDa hi miTa Dala ho

apne aa'mal pe phir koi pasheman kaise

kaun maKHluq-e-ghalat-kar ko dega kashti

nuh jab koi nahin hai to ye tufan kaise

tan gai aa ke samundar ki ye chadar kyun-kar

haT gaya sar se mere saya-e-yazdan kaise

aaj suraj nahin pani hai sawa-neze par

saj gaya sar pe mere hashr ka maidan kaise

kis ne aabaad gharondon ko khanDar kar Dala

bas gaye shahr ki galiyon mein bayaban kaise

apne hathon se jahan tu ne kiya hai aabaad

apne hathon se karega use viran kaise

mera insan bhaTakta to koi baat na thi

rasta bhul gaya hai tera insan kaise

kitne wahshi nikal aae hain sar-e-'am 'adim'

khul gaya fitrat-e-adam ka ye zindan kaise

ye nubuwwat ka zamana to nahin koi 'adim'

dil mein ubhri hawas-e-taKHt-e-sulaiman kaise

zindagi maut se bad-tar hui jati hai 'adim'

phir bhi hairat hai ki jine ke hain arman kaise

ruh par kitni KHarashen hain teri sanson ki

zindagi aur uThaun tere ehsan kaise