mujhe hasil surur-o-kaif paimane se kya hoga

mujhe hāsil surūr-o-kaif paimāne se kyā hogā

ghaḌī bhar ke liye dil ke bahal jaane se kyā hogā

butoñ se bhī 'ilāj-e-dard-e-insāñ ho nahīñ saktā

haram se jab nahīñ mumkin to but-ḳhāne se kyā hogā

sukūñ-afzā hai be-hoshī mujhe behosh rahne do

nahīñ mā'lūm mere hosh meñ aane se kyā hogā

ye un par munhasir hai vo ḳhushī deñ yā alam baḳhsheñ

Thahar jā dil Thahar jā tere ghabrāne se kyā hogā

tire vahshī ne ulfat ke kiye tai marhale saare

yahī kahtī rahī duniyā ki dīvāne se kyā hogā

tumheñ jo māñgnā hai ahl-e-dil se maañg lo 'muztar'

zamāne bhar ke aage haath phailāne se kyā hogā

mujhe hasil surur-o-kaif paimane se kya hoga

ghaDi bhar ke liye dil ke bahal jaane se kya hoga

buton se bhi 'ilaj-e-dard-e-insan ho nahin sakta

haram se jab nahin mumkin to but-KHane se kya hoga

sukun-afza hai be-hoshi mujhe behosh rahne do

nahin ma'lum mere hosh mein aane se kya hoga

ye un par munhasir hai wo KHushi den ya alam baKHshen

Thahar ja dil Thahar ja tere ghabrane se kya hoga

tere wahshi ne ulfat ke kiye tai marhale sare

yahi kahti rahi duniya ki diwane se kya hoga

tumhein jo mangna hai ahl-e-dil se mang lo 'muztar'

zamane bhar ke aage hath phailane se kya hoga